انا مين؟

انا اسراء محمود فهمى (اسراء فهمى)

خريجة اقتصاد وعلوم سياسية وبشتغل من اول ماتخرجت فى شركة software فى ال quality assurance فى جزء من مجال دراستى وهى الاحصاء 📉📊📈

جت عليا فترة كل ماتكلم اقول انا عايزة اشتغل حاجة بحبها علشان ابقى مبسوطة وانا بعملها ونفسيتى تبقى حلوة واتعامل بحب فى بقيت حياتى وكنت برده بقول انا نفسى اعمل حاجة لنفسى حاجة بحبها احس فيها بوجودى وقيمتى. بدأت ادور على الحاجة ديه لغاية ماوصلت ان اكتر حاجة هاتدينى ده هى التصوير 📸

قصتى مع التصوير بدأت من وانا صغيرة 😊

من صغرى وانا مهوسة تصوير، بصور كتير اى حاجة وفى اى وقت.

الناس اللى تعرفنى بيقولولى انتى مهووسة تصوير.

فى الاعدادية تقريبا بابا وماما جابولى هدية نجاحى كاميرا بتاعتى لوحدى، مش احترافية بس حلوة برده علشان عارفين انى بحب التصوير قوى 📸

بحب جدا اصور المناظر الطبيعية جوة وبرة مصر. عندى البومات للبحر والشمس والخضرة، فيها صور معقولة وصور كتير بايظة لانى زمان كنت بصور بالفيلم مش ديجيتال زى دلوقتى فمش ببقى عارفة الصورة هتطلع عاملة ازاى وحتى لما طلع الديجيتال كنت بصور وخلاص من غير مافهم اى حاجة فى التصوير 📷

مافكرتش زمان انى اتعلم التصوير مش عارفة ليه بصراحة 🤔 بس عمرى مابطلت اصور 🙂

من سنتين تقريبا بدأت افكر فى التصوير بشكل جد شوية. اخدت كورسات وحضرت ورش ولسة بحضر واشتريت كاميرا professional وبقيت اخدها معايا فى كل حتة 😀

لما اتعلمت التصوير عجبنى كمان فكرة تصوير المنتجات والاكل .. حاسة ان فيهم ابداع ومساعدة لتوصيل جهد حد تانى للناس 😉

بحس ان التصوير فن ممكن يورينا جمال فى حاجات احنا مش شايفنها بعنينا جميلة كدة. يعنى صورة لمكان الناس لما بتروح مش بتتفرج على الجمال بتبقى بتتكلم او مشغولة ممكن لو وريتهم صورة للمكان ده ميصدقوش ان ده اللى كانوا فيه 😍

الذكريات بنعيشها ونحسها تانى بالصور💫

بنتعرف على حاجات واماكن جديدة عن طريق الصور 🔍🌍🔎

تقدر توصل احساس عن طريق صورة 👌

لما تشوف صورة طفل بيضحك وتحس بالفرحة 😊

لما تشوف صورة دموع وتحس انك عايز تعيط 😭

حتى شغلنا بنسوقله عن طريق الصور 💲📦🛍🕶💍👗👔👠👞

كل حاجة ممكن تتحول وتترجم لصور. لما بتفكر فى حياتك ومستقبلك بترسم صورة فى خيالك، او تفتكر حاجة فاتت برضة بتفتكر صورة. الصور ممكن توحد ناس، تحرك قلوب.

مش متخيلة حياتنا من غير صور ❤